Ýewropada Howpsuzlyk we Hyzmatdaşlyk guramasynyň saýlaw gözegçileri Özbegistanda geçirilen prezidentlik saýlawlarynda Yslam Karimowa garşy hakyky oppozisiýanyň ýetmezçilik edendigini we saýlawlaryň dowamynda kanuny we guramaçylykly ýetmezçilikleriň ýüze çykandygyny aýtdylar.
ÝHHG-nyň Demokratik institutlary we Adam hukuklary boýunça edarasynyň Özbegistanda 29-njy martda geçirilen saýlawlardan bir gün soň, saýlawlar baradaky deslapky jemlemesini ýaýratdy. Onda Karimowyň häkimiýetdäki wagt möhleti uzaldyljak ýaly bolup görünýär.
ÝHHG-nyň Demokratik institutlary we Adam hukuklary boýunça edarasynyň çäkli saýlaw gözegçi missiýasynyň başlygy Tana de Zuluetanyň aýtmagyna görä, syýasy arenada Karimowyň şahsyýeti has agdyklyk etdi.
Şeýle-de, Zulueta “ýurduň konstitusiýasynda yzygiderli iki prezidentlik möhletiniň çäklendirilýändigine garamazdan”, Özbegistanyň Merkezi Saýlaw komissiýasy Karimowy dalaşgär hökmünde hasaba aldy diýdi.