Russiýa täze uran dron zarbalarynda Ukrainanyň energiýa we raýat infrastrukturasyny nyşana almagyny dowam etdirip, birnäçe sebitde we paýtagt Kiýewde elektrik togunyň kesilmegine sebäp boldy.
25-nji mart güni irden Kiýewe howa hüjümi signallary ýaň saldy we birnäçe uly partlamanyň bolandygy habar berildi. Resmiler, urlan raketa galyndylarynyň ýere gaçmagy netijesinde, ýaşaýyş jaýyna zyýan ýetirendigini habar berdiler.
Howa hüjümi baradaky duýduryş signallarynyň sesi ýene dokuz sebitde, şol sanda Herson, Mikolaýiw, Odesa we Dnipropetrowsk sebitlerinde-de eşidildi.
Russiýanyň uçuran pilotsyz uçarlary öten agşam günortadaky Mikolaýew şäherine hüjüm etdi.
Şäher häkimi Oleksandr Sienkewiç telegramda 11 parahat ýaşaýjynyň ýaralanandygyny we, “ýokardan gaçan ýarag galyndylary” sebäpli, birnäçe ýaşaýyş jaýynyň zyýan çekendigini ýazdy.
Mykolaýiw sebit harby administrasiýasynyň başlygy Witaliý Kim Eýranda öndürilen “Şahed” pilotsyz uçarynyň sebitdäki “energiýa desgasyna” ot açandygyny habar berdi.
Russiýanyň Gara deňiz porty Odesa garşy eden dron hüjümi elektrik togunyň kesilmegine sebäp boldy.
"Duşman Odesa sebitine hüjüm dronlary bilen hüjüm etdi" diýip, sebit harby administrasiýasynyň başlygy Oleh Kiper telegramda ýazdy. “Bu ýerde energetika infrastrukturasyna zyýan ýetdi. Odesanyň bir böleginde elektrik üpjünçiligi kesildi. Gyssagly kömek gulluklarynyň ählisi işleýär" diýip, ol aýtdy.
Russiýa soňky günlerde Ukrainanyň elektrik toruna garşy edýän hüjümlerini güýçlendirdi. Kiýew resmileri 23-nji martda 1 milliondan gowrak parahat ýaşaýjynyň elektriksiz galandygyny habar berdiler.
“Ukrenerhonyň” geňeş müdirliginiň başlygy Wolodymyr Kudrytskiý 23-nji martda ýurduň, çekilen ýitgileriň öwezini dolmak üçin, Ýewropadan edýän energiýa importyny ýokarlandyrandygyny aýtdy.
"Emma muňa garamazdan, köp sebitde energiýa infrastrukturasyna düýpli we uly möçberlerde zyýan ýetirildi" diýip, ol aýtdy. “Ýetirilen zyýanyň gerimi edilýän hüjümleriň gerimine barabar bolup çykýar".
Sebit harby administrasiýasynyň başlygynyň maglumatyna görä, Harkow sebitinde 200 müň töweregi adam elektriksiz galdy. Harkow şäheriniň metro ulgamy, elektrik togunyň ýetmezçiligi sebäpli, gijä galmak bilen işleýär diýip, sebit harby administrasiýasynyň başlygy Oleh Synyehubow aýtdy.
Harkow sebitiniň ýerli häkimiýetleri azyndan 31-nji marta çenli, elektrik toguny sagatda kesip bermek ulgamyny döretdiler.
Russiýanyň Goranmak ministrligi günorta Rostow sebitinde Ukrainanyň 11 sany pilotsyz uçarynyň “saklanandygyny” habar berdi.
Ýerli ýaşaýjylar bu sebitde bolan partlamalar barada habar bereninden soň, sebit gubernatory Wasiliý Golubew telegramda Nowoçerkasskdaky esasy elektrik we ýyladyş zawodynda ýangyn turandygyny aýtdy. Golubew ölen adamyň ýokdugyny, ýangynyň sebäbiniň derňelýändigini hem sözüne goşdy.
Forum